Leikið í Víkinni og á Kópavogsvelli

Tveir síðustu leikirnir í fyrstu umferð Pepsi-deildar karla fara fram í kvöld. Breiðablik tekur á móti KR og í gær var staðfest að Víkingar gætu tekið á móti Þórsurum á heimavelli sínum í Víkinni klukkan 19.15.

Þar eigast við nýliðarnir tveir í deildinni, Víkingur og Þór, sem urðu í tveimur efstu sætum 1. deildar í fyrra. Þá gerðu þau 1:1 jafntefli í Víkinni en Þór vann leikinn fyrir norðan, 4:3, eftir mikla dramatík í lokin.

Víkingar eru komnir í deildina á ný eftir þriggja ára fjarveru en Þór lék síðast í efstu deild fyrir níu árum.

Opnunarleikur á Kópavogsvellinum

Breiðablik og KR mætast á Kópavogsvelli og það er áfram formlegur opnunarleikur deildarinnar, eins og hann átti að vera á sunnudaginn. Mikið verður um dýrðir í tilefni af því og þétt dagskrá sem hefst nokkru fyrir leik. Flautað verður til hans klukkan 19.15.

Breiðablik leikur í kvöld sinn fyrsta heimaleik síðan liðið varð Íslandsmeistari síðasta haust. KR-ingum er spáð einu toppsætanna og liðin háðu tvo hörkuleiki síðasta sumar þar sem Blikar fóru með sigur af hólmi í bæði skiptin.

vs@mbl.is