Rúnar: Dómarinn túlkaði þetta á annan hátt

„Við getum ekki kallað þetta óheppni en þeir refsuðu okkur grimmilega fyrir okkar mistök,“ sagði Rúnar Kristinsson þjálfari KR eftir tapið gegn Dinamo Tbilisi í Evrópudeildinni í knattspyrnu í kvöld.

„Við fengum fjögur eða fimm dauðafæri en nýttum þau illa. Þeir spiluðu sig vel í gegn og kláruðu sín færi virkilega vel,“ sagði Rúnar sem var ósáttur við að ekki skyldi dæmd óbein aukaspyrna á Dinamo þegar leikmaður liðsins sendi boltann á markvörðinn sem tók boltann upp en í kjölfarið skoraði Dinamo og jafnaði metin.

„Ég er mjög ósáttur við það. Dómarinn túlkaði þetta á annan hátt og fyrir vikið fengu þeir skyndisókn sem við vorum allt of lengi að bregðast við og fengum á okkur mark. Maður hefði viljað fara með 1:0 stöðuna inn í hálfleikinn.“

Bjarni Guðjónsson og Magnús Már Lúðvíksson voru báðir á varamannabekk KR í kvöld allan leikinn.

„Við söknuðum þeirra að einhverju leyti en það komu fínir menn inná. Ásgeir stóð sig vel og Dofri líka. Við erum í erfiðri leikjatörn og þurfum að hreyfa til í liðinu. Við tókum þessa ákvörðun í dag og maður veit aldrei fyrir fram hvernig liðið og leikmenn munu bregðast við. Það er ekki hægt að lasta þá menn sem komu inn í liðið,“ sagði Rúnar sem stýrir KR næst gegn BÍ/Bolungarvík í bikarnum á sunnudag.

„Ég reikna með að vera með mitt besta lið þar. Við tökum þann leik af fullri alvöru og munum þurfa að hafa fyrir hlutunum.“

• 1 blogg um fréttina

Bloggað um fréttina

• Davíð Þ. Löve: Hvíla leikmenn!