„Einn öflugasti bakvörður á landinu“

„Þetta eru mikil gleðitíðindi, og sérstaklega fyrir Jósef. Hann er náttúrlega toppleikmaður,“ sagði Ólafur Örn Bjarnason, þjálfari Grindavíkur, sem getur teflt bakverðinum snjalla Jósef Kristni Jósefssyni fram gegn Víkingi R. í Pepsideildinni á mánudag í fyrsta sinn í ár.

Jósef samdi við búlgarska félagið PSFC Chernomorets Burgas í vetur en kom heim í vor vegna þess að Búlgararnir stóðu ekki við gerða samninga. Félagið neitaði hins vegar að skrifa undir félagaskipti og fór málið inn á borð alþjóðaknattspyrnusambandsins sem hefur nú loksins gert Grindvíkinginn lausan allra mála hjá búlgarska félaginu.

Ólafur segir Jósef, sem lék alla leiki Grindavíkur í fyrra, þó ekki geta gengið að sæti vísu í byrjunarliðinu enda hefur Grindavík gengið vel að undanförnu.

„Það er erfitt að mæta og spila fyrsta leik í næstum heilt ár, og þeir sem hafa spilað í hans stöðu í síðustu leikjum hafa ekkert gert til að verðskulda að fara úr liðinu. Þetta verður bara skoðað, en það vita allir að þetta er einn öflugasti bakvörður á landinu,“ sagði Ólafur.