Rúnar á heimleið en óvissa vegna meiðsla

Rún­ar Már Sig­ur­jóns­son er á heim­leið eft­ir helg­ina eft­ir að hafa verið í láni frá Val hjá hol­lenska úr­vals­deild­ar­fé­lag­inu Zwolle und­an­farna mánuði.

Rún­ar varð fyr­ir meiðslum fljót­lega eft­ir kom­una til Hol­lands og þau leiddu til þess að hann náði ekk­ert að spila með aðalliði fé­lags­ins.

„Ég veit ekk­ert hvenær ég get byrjað að spila á ný því þessi meiðsli sem eru í öðrum hæln­um eru al­gjört spurn­ing­ar­merki og erfitt að eiga við þau,“ sagði Rún­ar við mbl.is í morg­un og það er því al­veg óvíst hvenær Vals­menn fá að njóta krafta hans á Íslands­mót­inu sem hefst um næstu helgi.

Rún­ar var tví­mæla­laust besti leikmaður Vals á síðasta keppn­is­tíma­bili. Hann var í aðal­hlut­verki á miðjunni, lék alla 22 leiki liðsins, skoraði 7 mörk og lagði 9 upp. Í nóv­em­ber lék Rún­ar sinn fyrsta A-lands­leik, vináttu­lands­leik gegn Andorra, og skoraði þá annað marka Íslands í 2:0-sigri.

• Blogga um frétt