Ólafur: Krömdum leikinn í seinni hálfleik

„Þetta var erfiður leikur gegn sterku liði Vals sem er búið að vera gott í sumar. Við vorum að koma úr 120 mínútum á fimmtudaginn gegn Akranesi og lögðum leikinn þannig upp án þess að gera leikmenn meðvitaða um það,“ sagði Ólafur Kristjánsson, þjálfari Breiðabliks, eftir 1:0-sigurinn gegn Val í 8. umferð Pepsi-deildarinnar í kvöld

Leikurinn var ákaflega bragðdaufur, sérstaklega í fyrri hálfleik en Ólafur var ánægður með hvernig sínir menn komu til leiks í þeim síðar.

„Við vorum tiltölulega rólegir í fyrri hálfleik og vorum að þreifa á hlutunum. Það mun einhver segja að þetta var ekki skemmtilegasti fyrri hálfleikur sumar en þeir hafa verið nokkrir þannig hjá sumum.“

„Í seinni hálfleik skrúfum við á ákveðnum hnöppum og mér fannst við smá saman ná góðum tökum á leiknum og kremja hann. Þeir áttu ekki mögulega í öftustu línuna okkar og varnarleikinn. Leikurinn var lagður upp með tilliti til leiksins á Skaganum og mótherjans í dag,“ sagði Ólafur en Blikarnir lyftu sér með sigrinum upp fyrir Val á töflunni.

„Þetta eru þrjú stig sem koma í sarpinn og telja jafnmikið og öll önnur. Fyrir leikinn var ljóst að ynnum við ekki leikinn myndu Valsararnir fara töluvert fram úr okkur og það vildum við ekki láta gerast.“

Ólafur Kristjánsson. mbl.is/Ómar

• Blogga um frétt