Sögulegur sigur á bronsliði HM
Sindri Sverrisson
Setja bókamerki
Íslenska karlalandsliðið í knattspyrnu vann einn sinn stærsta, ef ekki þann alstærsta, sigur frá upphafi þegar liðið skellti Hollendingum, bronsliði síðasta HM, á Laugardalsvelli í kvöld í undankeppni EM í knattspyrnu, 2:0.
Ísland er því með fullt hús stiga eftir þrjá leiki og hefur enn ekki fengið á sig mark, en skorað átta. Liðið er jafnt Tékklandi á toppi A-riðils, með 9 stig, en næsta lið er Holland með 3 stig. Ísland mætir næst Tékklandi í Prag þann 16. nóvember í síðasta leik ársins.
Ísland fékk algjöra draumabyrjun en Gylfi Þór Sigurðsson kom liðinu yfir strax á 10. mínútu með marki úr vítaspyrnu. Birkir Bjarnason nældi í vítaspyrnuna af miklu harðfylgi en hann komst í veg fyrir sendingu úti við hornfána, og náði svo boltanum rétt á undan Stefan de Vrij sem braut á Birki innan teigs.
Hið ógnarsterka lið Hollands var mikið með boltann í leiknum en gekk ekki vel að finna glufur á vörn Íslands. Það var helst um miðjan fyrri hálfleik þegar Robin van Persie komst í mjög gott færi en Hannes Þór Halldórsson varði frá honum, og skömmu síðar þegar Arjen Robben átti skalla framhjá úr dauðafæri.
Undir lok fyrri hálfleiks kom seinna markið þegar Gylfi skoraði með föstu skoti upp í þaknetið úr teignum, í kjölfarið á hornspyrnu Emils Hallfreðssonar. Það var lengi vel óvíst hvort Gylfi gæti spilað leikinn vegna meiðsla en hann var magnaður eins og í öðrum leikjum keppninnar til þessa.
Ari Freyr Skúlason varð að fara af leikvelli og gat ekki spilað seinni hálfleik, en Birkir Már Sævarsson kom inná í hans stað og stóð vel fyrir sínu. Hollendingar reyndu að fjölga í sókn sinni en gekk ekkert að skapa sér nein dauðafæri. Ísland varðist vel og átti hættulegar skyndisóknir sem þó skiluðu ekki marki að þessu sinni.
Staða Íslands í undankeppninni er orðin afskaplega vænleg en aðeins 3 umferðum af 10 er lokið. Næsti leikur er eins og fyrr segir gegn Tékkum eftir rúman mánuð. Þetta var í fyrsta sinn í 11 tilraunum sem Íslandi tekst að vinna Holland.
Fylgst var með gangi mála hér á mbl.is og viðtöl koma inn síðar í kvöld. Fjallað verður ítarlega um leikinn í íþróttablaði Morgunblaðsins í fyrramálið.
| Ísland | 2:0 | Holland |
|
|---|---|---|---|
| Arjen Robben (Holland) á skot framhjá Robben á sínum uppáhaldsstað, hægra megin í teignum, en skotið fór framhjá. | |||
Úlfar: Heppileg tímasetning á gosinu
Beint: Eldgos hafið við Stóra-Skógfell
Átti ekki að láta pirring bitna á sjúklingi
Mjög alvarlegt ef Njarðvíkuræð gefur sig
Á algjöru frumstigi eftir þrjár vikur af verkfalli
Búseta skortir byggingarlóðir