Íslandsmeistarar Stjörnunnar úr Garðabæ fá ágætan aukapening í framhaldi af sölu Lokeren á danska knattspyrnumanninum Alexander Scholz til Standard Liege.
Scholz lék með Stjörnunni árið 2012 en fór þaðan til Lokeren og í samningnum var ákvæði um að Stjarnan fengi tíu prósent ef hann yrði seldur áfram.
Samkvæmt belgískum fjölmiðlum er kaupverðið á þessum 22 ára gamla varnarmanni þrjár milljónir evra. Stjarnan á þá rétt á 300 þúsund evrum en það eru 46 milljónir íslenskra króna.