Þórir Hákonarson, framkvæmdastjóri KSÍ, mun láta af störfum hjá sambandinu á næstunni en hann hefur sinnt starfinu frá því í febrúar árið 2007 og tók þá við af þáverandi framkvæmdastjóra og núverandi formanni, Geir Þorsteinssyni.
Þórir ritar pistil á heimasíðu KSÍ í dag þar sem hann þakkar fólki í hreyfingunni fyrir samstarfið. Þar kemur fram að Þórir muni hætta hjá KSÍ hinn 1. mars næstkomandi.
Þórir segist hafa íhugað frá því seint á síðasta ári að skipta um starfsvettvang og hann telur að nú sé rétti tíminn fyrir sig til að breyta til.
Ekki liggur fyrir hvort KSÍ hafi fundið eftirmann Þóris.