Albert sló markametið

Al­bert Brynj­ar Inga­son skráði nafn sitt í sögu­bæk­ur Fylk­is í gær­kvöld þegar hann skoraði sig­ur­mark Árbæj­arliðsins gegn Breiðabliki á Kópa­vogs­velli, 1:0, í Pepsi-deild karla í knatt­spyrnu.

Al­bert sló þarna marka­met fé­lags­ins í efstu deild en Sæv­ar Þór Gísla­son átti það. Sæv­ar skoraði 41 mark fyr­ir Fylki í deild­inni á ár­un­um 2000 til 2006.

Al­bert, sem lék korn­ung­ur við hlið Sæv­ars síðustu þrjú árin sem fram­herj­inn eld­fljóti frá Sel­fossi spilaði með Árbæj­arliðinu, hef­ur nú skorað 42 mörk fyr­ir Fylki í deild­inni. Að auki gerði Al­bert 13 mörk fyr­ir Val og FH og hef­ur því skorað 55 mörk í efstu deild. vs@mbl.is