Sex breytingar á liði Íslands

Íslenska landsliðið í knattspyrnu mætir Slóvakíu í vináttulandsleik í Zilina í kvöld og hefst leikurinn klukkan 19.45. Byrjunarlið Íslands er klárt og hafa verið gerðar sex breytingar á því frá tapinu gegn Pólverjum á fimmtudagskvöld.

Kári Árnason og Sverrir Ingi Ingason taka við miðvarðastöðunum af Ragnari Sigurðssyni og Hólmari Erni Eyjólfssyni og Haukur Heiðar Hauksson kemur í hægri bakvörðinn í stað Birkis Más Sævarssonar.  

Rúnar Már Sigurjónsson, sem kom inn á í hálfleik fyrir Aron Einar Gunnarsson í leiknum við Pólland, byrjar leikinn á miðjunni og Jóhann Berg Guðmundsson verður á kantinum.  Birkir Bjarnason færir sig inn á miðjuna í stað Gylfa Þórs Sigurðssonar. 

Loks fer Alfreð Finnbogason upp á topp við hlið Kolbeins Sigþórssonar í stað Jóns Daða Böðvarssonar, en Alfreð kom reyndar inn á snemma leiks gegn Póllandi fyrir Kolbein, sem varð fyrir meiðslum í aðdraganda vítaspyrnunnar sem Gylfi Þór Sigurðsson skoraði úr. 

Leikurinn verður í beinni textalýsingu hér á mbl.is.

Byrjunarlið Íslands gegn Slóvakíu

Markvörður
Ögmundur Kristinsson

Bakverðir
Haukur Heiðar Hauksson og Ari Freyr Skúlason

Miðverðir
Kári Árnason og Sverrir Ingi Ingason

Miðjumenn
Birkir Bjarnason og Rúnar Már Sigurjónsson

Kantmenn
Arnór Ingvi Traustason og Jóhann Berg Guðmundsson

Framherjar
Alfreð Finnbogason og Kolbeinn Sigþórsson (fyrirliði)

• 1 blogg um fréttina

Bloggað um fréttina

• Torfi Kristján Stefánsson: Gylfi ekki valinn!