Þýskaland með toppsætið í hendi sér

Möguleikar Íslands á að komast í lokakeppni heimsmeistaramóts kvenna í knattspyrnu 2019 minnkuðu verulega í dag þegar íslenska liðið tapaði 0:2 fyrir Þjóðverjum á Laugardalsvellinum í næstsíðustu umferð 5. riðils í undankeppninni.

Svenja Huth skoraði bæði mörk Þjóðverja sem nú eru með 18 stig en Ísland 16 fyrir síðustu umferðina. Þjóðverjum nægir nú jafntefli gegn Færeyingum í Þórshöfn á þriðjudaginn til að gulltryggja sér efsta sætið og HM-farmiðana. Ísland þarf hinsvegar jafntefli eða sigur gegn Tékkum á þriðjudaginn á Laugardalsvellinum til að halda öðru sætinu og eiga möguleika á að komast í umspil.

Frétt af mbl.is

Á hverju veltur HM-draumurinn?

Ísland náði að setja ágæta pressu á þýska liðið á fyrstu tíu mínútum leiksins, fyrst og fremst með löngum innköstum Sifjar Atladóttur.

Fyrsta færið var hinsvegar Þjóðverja þegar Sara Däbritz átti skot frá vítateigslínu á 12. mínútu, í þverslána og yfir íslenska markið.

Hallbera Guðný Gísladóttir átti ágæta skottilraun rétt utan vítateigs á 14. mínútu, eftir langt innkast Sifjar, en rétt framhjá samskeytunum vinstra megin.

Þýska liðið náði talsverðum sóknarþunga um miðjan hálfleikinn og þá áttu Carolin Simon og Melanie Leupolz hörkuskot rétt framhjá marki Íslands.

Langt innkast Sifjar skapaði aftur skotfæri á 28. mínútu. Selma Sól Magnúsdóttir átti hörkuskot af 20 m færi og Almuth Schult varði í hægra horninu niðri.

Guðbjörg Gunnarsdóttir varði langskot frá Leonie Maier á 34. mínútu og þýska liðið sótti áfram.

Komust yfir rétt fyrir hlé

Þýskaland náði forystunni á 42. mínútu. Melaine Leupolz skaut rétt utan vítateigs, Guðbjörg varði en Svenja Huth fylgdi á eftir á markteig og skoraði, 0:1.

Sara Björk Gunnarsdóttir fékk færi til að jafna á 43. mínútu eftir langt innkast Sifjar. Hún skaut af markteig en hitti boltann ekki vel og hann fór beint á Schult í markinu.

Litlu munaði að Alexandra Popp kæmi þýska liðinu tveimur mörkum yfir mínútu síðar þegar hún kastaði sér fram og skallaði hárfínt framhjá marki Íslands. Staðan 0:1 í hálfleik.

Þjóðverjar byrjuðu seinni hálfleik af miklum krafti og ætluðu greinilega að freista þess að ná öðru marki sem fyrst. Þeir voru tvisvar nærri því að skora í sömu sókninni en Guðbjörg og síðan Glódís Perla björguðu á síðustu stundu.

Nálægt því að jafna metin

Ísland fékk hinsvegar færi til að jafna á 57. mínútu þegar Fanndís Friðriksdóttir átti hörkuskot rétt utan vítateigs og boltinn straukst við stöngina hægra megin.

Eftir tíðindalítinn kafla þar sem þýska liðið réð ferðinni kom annað mark. Carolin Simon sendi boltann frá vinstri á Svenju Huth sem kom á ferðinni inní vítateiginn og skoraði með föstu skoti frá vítapunkti, 0:2.

Litlu munaði að Alexandra Popp bætti við marki mínútu síðar þegar hún skallaði framhjá úthlaupandi Guðbjörgu Gunnarsdóttur við vítateigslínuna en einnig framhjá markinu.

Þýska liðið var með leikinn í hendi sér eftir þetta og leikurinn fjaraði út án teljandi marktækifæra.

Ísland mætir Tékklandi klukkan 15.00 á þriðjudaginn og þar bíður annar erfiður mótherji en vonin um að komast á HM lifir áfram þó núna verði liðið að komast í gegnum þriðjudagsleikinn og síðan umspilsleiki til þess.

Fylgst var með gangi mála í leiknum í beinni textalýsingu sem sjá má hér fyrir neðan:

Ísland	0:2	Þýskaland	Opna lýsingu Loka
90. mín. Lina Magull (Þýskaland) kemur inn á
Augnablik — sæki gögn...

• 1 blogg um fréttina

Bloggað um fréttina

• Torfi Kristján Stefánsson: Hræðilega lélegur fyrri hjálfleikur hjá (Gr)Íslingunum