Áfall fyrir franska liðið
Hlúð að Marie-Antoinette Katoto á vellinum í Rotherham í gærkvöld.
AFP/Franck Fife
Setja bókamerki
Marie-Antoinette Katoto, einn skæðasti sóknarmaður franska kvennalandsliðsins í knattspyrnu, leikur ekki meira með liðinu á EM og missir því af leiknum gegn Íslandi á mánudaginn.
Katoto fór meidd af velli snemma leiks í leiknum við Belga í Rotherham í gærkvöld og í dag var skýrt frá því að um hnémeiðsli væri að ræða og hún yrði ekki meira með á mótinu.
Katoto er mikill markaskorari og skoraði 26 mörk í fyrstu 32 landsleikjum sínum fyrir Frakkland og hefur skorað 108 mörk í 113 leikjum með París SG í frönsku 1. deildinni á undanförnum sjö árum.
Hún skoraði 32 mörk fyrir Parísarliðið á síðasta tímabili, sjö þeirra í Meistaradeild Evrópu.
