Íþróttir | Enski boltinn | mbl | 20.9.2007 | 7:54

Deschamps orðaður við Chelsea

Didier Deschamps þykir sterklega koma til greina sem næsti knattspyrnustjóri Chelsea. Reuters

Frakkinn Didier Deschamps þykir koma sterklega til greina sem eftirmaður Jose Mourinho sem knattspyrnustjóri Chelsea en búist er við því að Ísraelinn Avram Grant verði í dag ráðinn tímabundið í starfið og stjórni liðinu gegn Englandsmeisturum Manchester United á Old Trafford á sunnudaginn.

Deschamps, sem var fyrirliði Frakka þegar þeir urðu heimsmeistarar 1998, lék með Chelsea á árunum 199-2000 og varð bikarmeistari með liðinu. Hann hóf þjálfaraferil sinn hjá Mónakó þar sem hann gerði góða hluti með og tók síðan við þjálfun Juventus. Hann hætti hjá ítalska liðinu í maí í vor og ekki neinu starfi núna.

Brotthvarf Mourinho frá Chelsea kom mörgum í opna skjöldu en vitað er þó að hann og Abramovich, eigandi Chelsea, hafa eldað grátt silfur saman síðustu mánuði. Eftir jafnteflið við Rosenborg í Meistaradeildinni í fyrrakvöld sauð á rússneska auðjöfrinum en ekki liggur ljóst fyrir hvort Mourinho gekk á dyr eða var rekinn en neyðarfundur var í herbúðum Lundúnarliðsins í gærkvöld.

Mourinho mun hafa haft samband við fimm af leikmönnum sínum í gærkvöld þar sem hann greindi þeim frá tíðindunum en margir leikmenn Chelsea og starfslið félagsins voru í kvikmyndahúsi í gærkvöld að fylgjast með myndinni Bláa byltingin. Myndin fjallar um Roman Abramovich eiganda Chelsea og árin sem hefur verið við völd hjá félaginu.