Wenger hyggst hvíla Gallas og Clichy

Arséne Wenger knattspyrnustjóri Arsenal hyggst stokka upp sitt lið þegar það mætir Burnley, liði Jóhannesar Karls Guðjónssonar, á útivelli í 3. umferð ensku bikarkeppninnar á sunnudaginn.

Wenger hyggst hvíla fyrirliðann Willam Gallas og bakvörðinn Gael Clichy en fram undan er áfram álag á liðsmönnum Wengers þar sem liðið leikur tvo undanúrslitaleiki gegn Tottenham í deildabikarkeppninni síðar í mánuðinum auk leikja í úrvalsdeildinni og bikarleiksins á sunnudag.

Emmanuel Adebayor mun hugsanlega missa af leiknum vegna meiðsla og þá er Robin Van Persie enn á sjúkralistanum. Eduardo da Silva fær því áfram að spreyta sig í framlínu Lundúnaliðsins en hann hefur skorað þrjú mörk í síðustu tveimur leikjum.

Jóhannes Karl hefur afplánað fjögurra leikja bann í liði Burnley og getur því tekið þátt í leiknum sem fram fer á Turf Moor, heimavelli Burnley, klukkan 14 á sunnudag.

• 1 blogg um fréttina

Bloggað um fréttina

• Snorri Bergz: Úff, ekki líst mér á þetta