Carragher fyrirliði í 500. leiknum

Jamie Carragher spilar annað kvöld sinn 500. leik fyrir enska knattspyrnufélagið Liverpool og verður fyrirliði liðsins af því tilefni.

Liverpool mætir þá 2. deildarliðinu Luton Town í annað sinn í bikarkeppninni en liðin gerðu óvænt jafntefli, 1:1, á heimavelli Luton um fyrri helgi.

Steven Gerrard, fyrirliði Liverpool, óskaði sérstaklega eftir því að Carragher yrði fyrirliði í þessum leik.

Rafael Benítez hyggst tefla fram sínu sterkasta liði. Nýi Slóvakinn, Martin Skrtel, er í leikmannahópnum og gæti spilað sinn fyrsta leik með félaginu.

Carragher verður þrítugur í lok janúar en hann hefur spilað allan sinn feril með Liverpool. Hann er fæddur í nágrannabænum Bootle og var sem strákur stuðningsmaður Everton en gekk svo til liðs við unglingalið Liverpool og hefur verið atvinnumaður hjá félaginu frá 18 ára aldri.

• 1 blogg um fréttina

Bloggað um fréttina

• Hallgrímur Guðmundsson: Mikill heiður fyrir Jamie Carragher.