Ferguson: Sýndum mikinn þroska

Alex Ferguson, knattspyrnustjóri Manchester United, var að vonum ánægður með frammistöðu sinna manna í dag þegar þeir unnu Liverpool 3:0 á Old Trafford.

„Þetta var virkilega góð frammistaða - liðið sýndi mikinn þroska. Við höfum séð liðið taka framförum undanfarin hálft ár og í dag sýndi það allar sínar bestu hliðar," sagði Ferguson við Sky Sports.

Um brottrekstur Javiers Mascheranos á 44. mínútu sagði Ferguson. „Hann var kominn með gult spjald og hélt áfram að nöldra í dómaranum. Það hefur verið rætt mikið um slík mótmæli undanfarið og hann hélt áfram að mótmæla."

Ferguson sagði að titillinn væri langt frá því að vera í höfn þrátt fyrir þennan sigur. „Þetta verður barátta til síðasta leiks því Chelsea og Arsenal spila mjög vel. Við unnum sterkt lið Liverpool sem hefur spilað góðan fótbolta."

• 3 blogg um fréttina

Bloggað um fréttina

• Óskar Þorkelsson: Leikurinn í dag.. og Rafa.
• Einar Vignir Einarsson: Fábært lið................
• Ómar Ingi: Dómarinn / Hugleiðing