Óvíst með Carrick gegn Roma

Óvíst er hvort enski landsliðsmaðurinn Michael Carrick geti leikið með Manchester United gegn Roma í Meistaradeild Evrópu í knattspyrnu annað kvöld en liðin mætast þá í Rómarborg. Það er fyrri viðureign liðanna í átta liða úrslitum keppninnar.

Carrick meiddist í leiknum við Aston Villa á laugardaginn og gat ekki æft í gær. Reiknað er með að það skýrist ekki fyrr en á síðustu stundu á morgun hvort hann verði leikfær.

Þeir Edwin van der Sar, Ryan Giggs og Patrice Evra gátu hinsvegar allir æft á fullu með United í Róm í dag en þeir voru einnig tæpir eftir leikinn gegn Villa.

Þá heldur Gary Neville áfram að vinna sig í átt að liði Manchester United en hann spilaði í kvöld heilan leik með varaliði félagsins þegar það gerði jafntefli, 1:1, við Newcastle.

• 1 blogg um fréttina

Bloggað um fréttina

• Ólafur Tryggvason: Slæmar fréttir