Íþróttir | Enski boltinn | mbl | 13.7.2008 | 12:45

Skipta Arsenal og Barcelona á framherjum?

Emmanuel Adebayor framherji Arsenal er eftirsóttur. Reuters

Barcelona hyggst gera lokatilboð í Emmanuel Adebayor framherja Arsenal á næstu dögum og að því fram kemur í spænska blaðinu Sport í dag eru Börsungar tilbúnir að láta Arsenal fá sóknarmanninn Samuel Eto'o í skiptum fyrir Tógómanninn og greiða Arsenal 10 milljónir evra að auki, 1,2 milljarða króna.

Það eru fleiri lið en Barcelona sem vilja fá Adebayor því AC Milan hefur mikinn áhuga á að fá Tógmómanninn, sem skoraði 30 mörk fyrir Arsenal á síðustu leiktíð.

Umboðsmaður Adebayors lét hafa eftir sér í gær að Arsenal væri reiðubúið lækka verðmiðann á leikmanninum og var vitnað í Galliani, einn af forkólfum Mílanóliðsins, sem sagðist hafa undir höndum bréf frá Arsenal sem í stóð meðal annars; „Við erum tilbúin að endurskoða verðmiðann á Adebayor ef þið hafið ennþá áhuga á því að kaupa leikmanninn.“