O’Neill: Fyrst og fremst ánægður með sigurinn

„ÉG er fyrst og fremst ánægður með sannfærandi sigur því ég var ekki alveg í rónni fyrir leikinn,“ sagði Martin O’Neill, knattspyrnustjóri Aston Villa á blaðamannafundi eftir sigurinn, 4:1, á FH á Laugardalsvelli í kvöld.

„Við unnum á sannfærandi hátt en FH-liðið veitt okkur verðuga keppni
frá fyrstu mínútu. Liðið lagði ekki árar í bát þrátt fyrir að hafa fengið á
sig tvö mörk snemma leika heldur hélt það skipulagi sínu, lék sinn leik
og tókst að halda okkur á tánum. Mark FH-liðsins var gott og verðskuldað því FH-liðið hafði ógnað okkur nokkrum sinnum áður en markið var gert,“ sagði O’Neill, sem  lauk lofsorði á framgöngu FH-liðsins sem hann sagði hafa verið til fyrirmyndar. Það hafi leikið sinn leik og spilað líkt og það gerði í síðustu viðureign sinni í Landsbankadeildinni. 

O’Neill sagðist reikna með að stilla upp sterku liði í síðari leiknum þrátt fyrir sannfærandi sigur í kvöld og góða forystu. „Við megum ekki við því að sýna kæruleysi og eiga á hættu að missa niður gott forskot.“

O’Neill sagði það hafa verið ákvörðun Gartehs Barry að taka þátt í leiknum í kvöld en mikið hefur verið rætt og ritað um hugsanleg vistaskipti hans til Liverpool. Með þátttöku sinni í leiknum í kvöld er ljóst að hann getur ekki leikið með Liverpool í fyrsta hluta Meistaradeildar Evrópu verði af kaupum Liverpool á kappanum áður en skiptiglugganum verður lokað um næstu mánaðarmót. „Barry veit hvaða afleiðingar þátttaka hans í leiknum getur haft en hann vildi endilega spila, það var ekkert sem gat haldið aftur af honum í þeim efnum," sagði O’Neill.

Ítarlegra viðtal við O’Neill verður í íþróttablaði Morgunblaðsins sem kemur út í fyrramálið.

• 1 blogg um fréttina

Bloggað um fréttina

• Friðrik Friðriksson: Ef íslenska landsliðið okkar gæti það sama og FH gerði …