Íþróttir | Enski boltinn | mbl | 5.10.2008 | 10:45

Sex leikir í Englandi í dag

Liverpool hefur verið á góðu róli það sem af er tímabilinu en á erfiðan útileik í dag. Reuters

Sex leikir fara fram í ensku úrvalsdeildinni í knattspyrnu í dag og tveir af þeim áhugaverðustu hefjast klukkan 14. Þá eigast Manchester City og Liverpool við á Borgarleikvanginum í Manchester og Chelsea tekur á móti Aston Villa á Stamford Bridge.

City og Villa hafa bæði farið vel af stað og gera sig líkleg til að ógna stórveldunum fjórum í deildinni. Leikirnir í dag segja nokkuð um hvort þau séu tilbúin í þann slag.

Íslendingafélagið West Ham fær Bolton í heimsókn og getur þar styrkt enn frekar stöðu sína í hópi efstu liða deildarinnar. Það er fyrsti leikur dagsins og hefst klukkan 12.30. Grétar Rafn Steinsson verður án efa í sinni stöðu sem hægri bakvörður hjá Bolton en Heiðar Helguson má sætta sig við varamannabekkinn áfram.

Hermann Hreiðarsson og félagar í Portsmouth fá gamla Íslendingafélagið Stoke City í heimsókn klukkan 14 og þá leikur líka Tottenham við spútnikliðið Hull City. Hermann hefur verið varamaður að undanförnu hjá Portsmouth.

Loks eigast Everton og Newcastle við klukkan 15.