Íþróttir | Enski boltinn | mbl | 1.11.2008 | 19:30

Tottenham fyrst til að sigra Liverpool

Vedran Corluka varnarmaður Tottenham spyrnir frá marki sínu en Dirk Kuyt sem gerði mark Liverpool fylgist með. Reuters

Tottenham, neðsta lið ensku úrvalsdeildarinnar, lagði efsta liðið, Liverpool, að velli, 2:1, í síðasta leik dagsins í deildinni sem fram fór á White Hart Lane, heimavelli Tottenham í London. Þetta er fyrsti ósigur Liverpool á tímabilinu en Tottenham vann þarna sinn 1.500. sigur í ensku deildakeppninni frá upphafi.

Liverpool fékk óskabyrjun því Dirk Kuyt skoraði með þrumuskoti strax á 3. mínútu eftir sendingu frá Robbie Keane, fyrrum leikmanni Tottenham. En Jamie Carragher varð fyrir því að jafna metin með sjálfsmarki á 70. mínútu. Það var síðan Roman Pavlyuchenko sem skoraði sigurmarkið á síðustu mínútunni og fjórar mínútur í uppbótartíma nægðu ekki Liverpool til að jafna..

Bein lýsing.

Þar með er Chelsea á toppnum eftir leiki dagsins með 26 stig, eins og Liverpool, en með betri markatölu. Manchester United er í þriðja sæti með 21 stig.

Tottenham komst úr botnsætinu og uppí þriðja neðsta sæti, og liðið er taplaust í fyrstu þremur leikjunum undir stjórn Harrys Redknapps. Það er nú með 9 stig, eins og Newcastle, en Bolton er neðst með 8 stig. Bæði Newcastle og Bolton eiga þó leik til góða, á morgun og mánudag.