Íþróttir | Enski boltinn | mbl | 30.11.2008 | 18:21

Yakubu úr leik til vorsins

Aiyegbeni Yakubu verður ekki meira með Everton í vetur. Reuters

Ayiegbeni Yakubu, nígeríski knattspyrnumaðurinn hjá Everton, sleit hásin í fæti í leik liðsins gegn Tottenham í ensku úrvalsdeildinni í dag og leikur ekki meira með á þessu keppnistímabili.

Atvikið átti sér stað strax á 11. mínútu leiksins, í návígi við Ledley King, og leit sakleysislega út en framherjinn kröfugi þurfti að fara af velli og David Moyes knattspyrnustjóri staðfesti síðan alvarleika meiðslanna.

Louis Saha kom inná í hans stað en ekki vildi betur til en svo að hann tognaði aftan í læri í seinni hálfleiknum og þurfti líka að fara af velli. Þar með er aðeins einn sóknarmaður tilbúinn hjá Everton fyrir næstu leiki, Victor Anichebe.