Segir að Abramovich hafi rekið Scolari

Roman Abramovich eigandi Chelsea tók þá ákvörðun að reka Luiz Felipe Scolari úr starfi knattspyrnustjóra Chelsea segir talsmaður Scolaris. Brasilíumaðurinn fékk að taka poka sinn eftir dapurt gengi Chelsea-liðsins á síðustu vikum en brottreksturinn kom engu að síður mörgum á óvart.

,,Það lítur allt út fyrir að Abramovich hafi tekið ákvörðunina,“ segir Acaz Fellegger talsmaður Scolari í samtali við dagblaðið Lance. „Scolari var ekki í þægilegri stöðu þrátt fyrir að hafa stuðning leikmanna og framkvæmdastjórans Peter Kenyon.  Felipe óskaði eftir því að kaupa Deco og Robinho en félagið keypti bara Deco.“

Scolari segir á vef Fellegger að hann muni fljótlega tjá sig við fjölmiðla en fram að því óski hann Chelsea góð gengis.

,,Ég óska Chelsea góðs gengis í þeim þremur keppnum sem það er í. Ég vil líka nota tækifærið og staðfesta að ég mun búa áfram í London og mun tjá við fjölmiðla fljótlega,“ segir Scolari.

• 1 blogg um fréttina

Bloggað um fréttina

• Bergur Thorberg: Scolari til Portsmouth eða Newcastle?