Ummæli Rooneys fjarlægð af vef Man.Utd

Manchester United fjarlægði í morgun ummæli Waynes Rooneys í garð Liverpool af vef sínum og talsmaður félagsins sagði að það væri  gert til að koma í veg fyrir mistúlkun á þeim.

Rooney sagði í viðtali við sjónvarpsstöð Manchester United að sem Everton-maður frá æsku hefði hann alist upp við að hata Liverpool og það hefði ekkert breyst. Þessi ummæli voru klippt út áður en viðtalið var sýnt á stöðinni en þau voru birt á vef félagsins.

Manchester United og Liverpool mætast í sannkölluðum stórleik í ensku úrvalsdeildinni í knattspyrnu í hádeginu á morgun og talsmaður United sagði að það hefði verið talið farsælast að fjarlægja ummæli Rooneys í garð Liverpool.

„Við töldum það besta kostinn fyrir þennan leik. Ummælin eru á þá leið að þau er hægt að mistúlka og leggja út frá þeim á  verri veg og hvorki félagið né Wayne vilja sjá slíkt gerast," sagði talsmaður Manchester United við BBC í dag.

• 1 blogg um fréttina

Bloggað um fréttina

• Gísli Foster Hjartarson: Smámál