Ferguson að skoða ungan Brassa

Douglas Costa, 18 ára Brasilíumaður í liði Gremio, er nú orðaður við Englandsmeistara Manchester United, en umboðsmaður leikmannsins segir, að United hafi þegar haft samband vegna mögulegra kaupa á leikmanninum.

„Þeir (United) hafa fundið fjóra til fimm leikmenn sem gætu fyllt skarð Ronaldo, og Costa er einn þeirra. Það hefur verið haft samband við okkur frá nokkrum liðum á liðnum árum, og er United á meðal þeirra,“ sagði Cesar Bottega við Radio Caucha útvarpsstöðina.

Manchester hefur fylgst með leikmanninum í um tvö ár, en Real Madrid, Barcelona og Inter hafa einnig haft augastað á leikmanninum.

Costa verður 19 ára í september og er sagður hinn nýji Ronaldinho. Hann er örvfættur miðjumaður og þykir mikill aukaspyrnusérfræðingur, sem hafi gott auga fyrir samspili. Hann hefur þó aðeins gert eitt mark í 10 leikjum á síðustu tveimur tímabilum fyrir Gremio.

Samningur hans hjá Gremio er til 2013, en samkvæmt klásúlu getur Gremio ekki neitað ef tilboð upp á 21 milljón punda berst í leikmanninn.

• 1 blogg um fréttina

Bloggað um fréttina

• Jóhann Elíasson: Skoðar hann BRASSA?????