Stoke blandar sér í baráttuna um Owen

Stoke hefur blandað sér í baráttuna um sóknarmanninn Michael Owen sem hefur ákveðið að yfirgefa Newcastle í lok mánaðarins þegar samningur hans við liðið rennur út.

,,Aldrei að segja aldrei í fótbolta. Vitanlega hefðum við áhuga á að fá hann til okkar. Ég er ekki viss um hvort Michael vilji koma til okkar núna að staðan gæti breyt hjá honum. Það yrðu frábær kaup í honum og hann getur fullvissað sig um að stuðningsmenn okkar tæku honum sérlega vel, “ segir Tony Pulis í viðtali við enska blaðið Sentinel.

Hull City hefur borið víurnar í Owen sem er 29 ára gamall en meiðsli hafa plagað þennan annars góða fótboltamann undanfarin ár. Það sést best á því hann hefur aðeins náð að leika 79 leiki með Newcastle frá því hann var keyptur til liðsins frá Real Madrid fyrir fjórum árum.