Ajay kallaður til Crewe vegna meiðsla

Talsmaður enska 3. deildarfélagsins Crewe Alexandra, þar sem Guðjón Þórðarson er knattspyrnustjóri, staðfesti við Sky Sports í kvöld að framherjinn Ajay Leitch-Smith hefði verið kallaður aftur til félagsins úr láni hjá ÍBV.

Ástæðan er sú að Clayton Donaldson, aðal framherji Crewe, brákaðist á fæti í leik liðsins á laugardaginn og verður frá keppni í minnsta kosti sex vikur. Talsmaður Crewe sagði að hann yrði jafnvel ekki leikfær fyrr en í nóvember.

Leitch-Smith hefur til þessa spilað með unglingaliðum og varaliði Crewe en hann er aðeins 19 ára gamall og hefur vakið talsverða athygli fyrir frammistöðu sína með Eyjamönnum í sumar.

Fram kom um síðustu helgi að bæði Leitch-Smith og Chris Clements færu frá ÍBV til Crewe og yrðu ekki meira með Eyjaliðinu á tímabilinu. Ekkert hefur verið staðfest um komu þeirra til Crewe á vef félagsins enn sem komið er.

• 1 blogg um fréttina

Bloggað um fréttina

• Gísli Foster Hjartarson: Tekið var fram....