Íþróttir | Enski boltinn | mbl | 26.9.2009 | 9:33

Gerrard: Réttarhöldin breyttu mér

Steven Gerrard fyrirliði Liverpool. Reuters

Steven Gerrard fyrirliði Liverpool segir að dómsmálið sem höfðað var gegn honum hafi breytt sér en Gerrard var kærður fyrir uppþot á krá eftir 5:1 sigur Liverpool á Newcastle í desember á síðasta ári. Gerrard, sem skoraði tvö mörk í leiknum, var úrskurðaður saklaus í málinu en í viðtali við breska blaðið Daily Mail segir Gerrard að hann hafi verið mjög óttasleginn og það hafi tekið mjög á sig að mæta í réttarsalinn.

,,Réttarhöldin breyttu mér. Ég verð að læra af þessu, læra það að vera á röngum stað á röngum tíma, á hvaða tíma ég er úti, hvert ég fer, ég mun verða varkárari í framtíðinni,“ segir Gerrard við Daily Mail en hann fór á barinn eftir leikinn ásamt vinum sínum til að fagna sigrinum á Newcastle.

,,Núna er það þannig að ef við vinnum 5:1, ég skora tvö mörk og við komumst á toppinn í deildinni þá mun ég ekki reyna að fagna því með því að fara á bar með vinum mínum. Ég mun fá mér málsverð heima klukkan hálf níu. Við erum vel launaðir og við þurfum að fórna ýmsu. Ég sagði við sjálfan mig á meðan þessu stóð að ég ætlaði mér aldrei að ganga inn í réttarsal aftur. Þetta er ekki góður staður til að vera á,“ sagði Gerrard.