Íþróttir | Enski boltinn | mbl | 28.11.2009 | 16:50

Þrenna Rooney í öruggum sigri United

Ryan Giggs og Wayne Rooney áttu góðan leik fyrir United í dag. Reuters

Wayne Rooney skoraði þrennu þegar Englandsmeistarar Manchester United unnu Hermann Hreiðarsson og félaga í Portsmouth 4:1 í ensku úrvalsdeildinni í knattspyrnu í dag. Þrjár vítaspyrnur voru dæmdar í leiknum og skoraði Rooney úr tveimur þeirra. Fimm leikir til viðbótar fóru fram og var fylgst með gangi mála hér á mbl.is.

Einn leikur til viðbótar er í dag en það er viðureign Aston Villa og Tottenham í Birmingham.

Portsmouth - Manchester United, 1:4

Eftir góða sókn United fékk Wayne Rooney boltann innan teigs þar sem Michael Brown braut á honum og vítaspyrna dæmd. Rooney tók spyrnuna sjálfur og kom meisturunum yfir á 25. mínútu en markið kom nokkuð gegn gangi leiksins. Portsmouth jafnaði hins vegar metin strax á 33. mínútu með marki frá Kevin-Prince Boateng úr annarri vítaspyrnu en erfitt var að sjá hvers vegna hún var dæmd.

Seinni hálfleikur var rúmlega tveggja mínútna gamall þegar Wayne Rooney kom United yfir á nýjan leik eftir sendingu inn fyrir vörn Portsmouth frá Ryan Giggs. Rooney fullkomnaði svo þrennuna með marki úr þriðju vítaspyrnu leiksins á 54. mínútu en hana fiskaði Giggs. Giggs skoraði svo sjálfur fjórða markið úr aukaspyrnu á 87. mínútu og kom United í 4:1, en þetta var 100. mark Giggs í úrvalsdeildinni.

Bein lýsing.

Wigan - Sunderland, 1:0

Hugo Rodallega skoraði eina mark leiksins eftir sendingu frá Paul Scharner á 77. mínútu.

Bein lýsing.

West Ham - Burnley, 5:3

Jack Collison kom West Ham yfir á 18. mínútu eftir stungusendingu frá Scott Parker. Junior Stanislas bætti við öðru marki á 33. mínútu og kom West Ham í 2:0 eftir stungusendingu frá Guillermo Franco. West Ham fékk svo vítaspyrnu á 43. mínútu eftir að brotið hafði verið á Jonathan Spector. Carlton Cole skoraði úr spyrnunni.

Á 51. mínútu kom svo fjórða mark heimamanna og í þetta skiptið var það Franco sem skoraði eftir sendingu frá Stanislas. Luis Jimenez bætti við fimmta markinu úr vítaspyrnu á 64. mínútu. Steven Fletcher náði að klóra í bakkann fyrir Burnley á 67. mínútu eftir sendingu frá Chris Eagles. Fletcher bætti við öðru marki á 74. mínútu og aftur átti Eagles sendinguna en það var Eagles sem skorað þriðja mark Burnley í lok uppbótartíma.

Bein lýsing.

Manchester City - Hull, 1:1

Shaun Wright-Phillips skoraði með skoti af löngu færi rétt áður en flautað var til leikhlés og kom heimamönnum í 1:0. Jimmy Bullard jafnaði metin fyrir Hull úr vítaspyrnu á 82. mínútu.

Bein lýsing.

Fulham - Bolton, 1:1

Grétar Rafn Steinsson og félagar í Bolton komust í 1:0 á 34. mínútu með marki Ivan Klasnic eftir sendingu frá Gary Cahill. Damien Duff jafnaði metin fyrir heimamenn á 76. mínútu með hægrifótarskoti, merkilegt nokk, eftir sendingu frá Erik Nevland.

Bein lýsing.

Blackburn - Stoke, 0:0

Bein lýsing.