Hughes rekinn og Mancini tekur við

Mark Hughes knattspyrnustjóra Manchester City var sagt upp störfum hjá félaginu í kvöld og Ítalinn Roberto Mancini var ráðinn í hans stað. Forráðamenn Manchester-liðsins staðfestu þetta nú í kvöld en orðrómur hefur verið í gangi síðustu daga að Hughes kynni að missa starf sitt.

Manchester City lagði Sunderland í dag, 4:3, en það breytti engu fyrir Hughes. City-liðið er í sjötta sæti deildarinnar en miklu var kostað til hjá félaginu í sumar og margir leikmenn keyptir fyrir fúlgufjár. City hefur aðeins tapað tveimur leikjum í deildinni en liðið hefur gert átta jafntefli og hefur aðeins náð að vinna tvo af síðustu 11 leikjum sínum í deildinni.

Brian Kidd, fyrrum aðstoðarmaður Sir Alex Ferguson hjá Manchester United og stjóri Blackburn um tíma, hefur verið ráðinn aðstoðarmaður Mancini, sem stýrir liði City í fyrsta sinn á öðrum degi jóla þegar liðið mætir Stoke.

Hughes tók við stjórastöðunni af Sven Göran Eriksson í júní 2008. Walesverjinn, sem er 46 ára gamall, var við stjórvölinn hjá welska landsliðinu og Blackburn áður en hann kom til City. Hann stýrði City í 77 leikjum í úrvalsdeildinni. Liðið vann 35 þeirra, tapaði 25 og gerði 16 jafntefli.

• 1 blogg um fréttina

Bloggað um fréttina

• Gísli Foster Hjartarson: N 1