Adebayor í ótímabundnu leyfi

Roberto Mancini, knattspyrnustjóri Manchester City, segir að framherjanum Emmanuel Adebayor hafi verið veitt ótímabundið leyfi til að jafna sig eftir skotárásina á landsliðsrútu Tógómanna síðasta föstudag. Hann þurfi ekki að mæta til félagsins á ný fyrr en hann telji sig tilbúinn til þess.

Tógómenn drógu lið sitt útúr Afríkukeppninni í kjölfar skotárásarinnar þar sem þrír úr fylgdarliði landsliðsins létust og markvörður liðsins liggur enn þungt haldinn á sjúkrahúsi. Í morgun var endanlega staðfest af hálfu Afríska knattspyrnusambandsins að þeir myndu ekki mæta aftur til leiks.

„Ég er afar leiður fyrir hönd Adebayors því það er óbærilegt að lenda í svona stöðu. Ég gef honum þann tíma sem hann þarf og síðan ræðum við málin þegar hann kemur aftur. Í kjölfarið á því ákveðum við hvenær hann sé tilbúinn til að spila með okkur á ný," sagði Mancini eftir 4:1 sigurinn á Blackburn í gærkvöld.

Adebayor er fyrirliði Tógó og hann hefur lýst því sem gerðist á föstudag í fjölmiðlum. Hann segir að leikmenn liðsins hafi allir talið að þeirra síðasta stund væri runnin upp og þeir hefðu hringt í fjölskyldur sínar af gólfi rútunnar, þar sem þeir lágu til að forðast skothríðina, til að kveðja þær hinsta sinni.

• 1 blogg um fréttina

Bloggað um fréttina

• Sigurpáll Ingibergsson: Ade vel klæddur