Margt í gangi hjá Tottenham

Ef marka má enska fjölmiðla, er þessi föstudagur langur hjá Harry Redknapp knattspyrnustjóra Tottenham Hotspur og forráðamönnum Lundúnafélagsins. Þeir eru uppteknir við að semja um nýja leikmenn og í leiðinni að losa sig við aðra frá félaginu áður en lokað verður fyrir félagaskiptin á mánudagskvöldið.

Eiður Smári Guðjohnsen verður væntanlega orðinn formlega leikmaður Tottenham síðar í dag. Samkvæmt heimildum mbl.is er hann á leið á sína fyrstu æfingu nú um hádegið og ef allt verður klappað og klárt varðandi leikheimild gæti hann farið beint í leikmannahópinn fyrir leikinn gegn Birmingham á morgun.

Tottenham er ennfremur í viðræðum við Portsmouth um að fá varnarmanninn öfluga Younes Kaboul aftur til félagsins, sem og bosníska markvörðinn Asmir Begovic, sem hefur slegið í gegn með suðurstrandarliðinu að undanförnu í fjarveru David James.

Rússneski framherjinn Roman Pavluychenko virðist örugglega á förum en ekki er ljóst hvert og Tottenham er sagt hafa hafnað 8 milljón punda tilboði í hann frá Birmingham. Pavluychenko hefur aldrei verið í byrjunarliði Tottenham í úrvalsdeildinni í vetur og aðeins komið inná í fjórum leikjum.

Robbie Keane, „félagsfyrirliði“ Tottenham, gæti líka farið frá félaginu. Daily Mail fullyrðir í dag að Tottenham hafi boðið bæði West Ham og Celtic hann til kaups en laun Keanes standi þar í veginum. Það gæti því endað þannig að Tottenham lánaði hann til annars hvors félagsins út þetta tímabil.

Tottenham hefur þó ekkert sagt ennþá frá neinum umsvifum á leikmannamarkaðnum á vef sínum í dag og hefur ekki tilkynnt opinberlega um samninginn við Eið Smára, enn sem komið er.

• 1 blogg um fréttina

Bloggað um fréttina

• Haukur Gunnarsson: Tottenham of gott lið fyrir Eið Smára