Wenger: Liðið hefur þroskast mikið

Arsene Wenger knattspyrnustjóri Arsenal sagði að það væru ótvíræð þroskamerki á sínu liði að það skyldi sigra Ipswich 3:0 í deildabikarnum í gærkvöld þrátt fyrir markaleysi langt framí seinni hálfleik.

Ipswich vann fyrri leikinn 1:0 og hélt hreinu í klukkutíma á Emirates leikvanginum í gærkvöld. Arsenal sneri blaðinu við og leikur til úrslita í keppninni gegn West Ham eða Birmingham.

„Fyrir einu eða tveimur árum hefði liðið orðið taugaveiklaðra eftir því sem hefði liðið á leikinn. En nú hélt það bara sínu striki og það er ljóst að strákarnir hafa þroskast mikið," sagði Wenger við BBC.

Arsenal hefur lent í vandræðum með Leeds og Ipswich úr 1. deildinni í bikarmótunum tveimur í þessum mánuði og Wenger hældi þeim.

„Eftir þessa leiki við Leeds og Ipswich er ljóst að 1. deildin hefur styrkst mikið undanfarin fimm til sex ár. Líkamlegur styrkur liðanna er mikill og Ipswich stendur jafnfætis úrvalsdeildarliðunum á því sviði, það er engin spurning," sagði Wenger.

• 1 blogg um fréttina

Bloggað um fréttina

• Haraldur Haraldsson: Wenger: Liðið hefur þroskast mikið/það er gott mjög ,en samt …