Íþróttir | Enski boltinn | mbl | 26.4.2011 | 20:34

Öruggur sigur Man.Utd í Þýskalandi

Joel Matip hjá Schalke reynir að stöðva Javier Hernández í leiknum í kvöld. Reuters

Manchester United er komið með annan fótinn í úrslitaleik Meistaradeildar Evrópu í knattspyrnu eftir öruggan sigur á þýska liðinu Schalke, 2:0, í fyrri leik liðanna í undanúrslitunum í Gelsenkirchen í kvöld.

Manchester United hafði mikla yfirburði lengst af í leiknum, sérstaklega í fyrri hálfleik þegar Manfred Neuer markvörður hélt þýska liðinu algjörlega á floti. Mörkin kom svo loks um miðjan síðari hálfleik, á tveggja mínútna kafla, en Ryan Giggs og Wayne Rooney voru þar að verki.

Seinni leikur liðanna fer fram á Old Trafford í Manchester í næstu viku.

Fylgst var með gangi mála hér á mbl.is.

90. Leik lokið. Sigur United var aldrei í minnstu hættu.

69. MARK - 0:2. Wayne Rooney bætir við marki fyrir United, stingur sér inní vítateiginn, fær boltann frá Javier Hernández og laumar honum í netið.

67. MARK - 0:1. Loksins brýtur United ísinn. Ryan Giggs fær sendingu frá Wayne Rooney í gegnum miðja vörn Schalke og rennir boltanum yfirvegað á milli fóta Neurs og í netið.

48. Seinni hálfleikur hefst á sömu nótum og sá fyrri. Þegar komin tvö dauðafæri hjá United, Neuer varði skalla Patrice Evra í horn og Ryan Giggs var kominn í upplagt færi en skaut langt framhjá með hægri fæti.

45. Flautað til hálfleiks og Manuel Neuer á einn og óstuddur heiðurinn af því að staðan skuli enn vera markalaus. Manchester United hefur haft algjöra yfirburði og óð í færum í fyrri hálfleik en Neuer varði hvað eftir annað af snilld.

45. Ryan Giggs kemst innfyrir miðja vörn Schalke eftir glæsilegt spil en Manuel Neuer kemur út á móti honum og bjargar glæsilega!

36. Tvö dauðafæri United í sömu sókninni. Neuer ver hörkuskot frá Hernández, Park fær boltann í kjörstöðu en þrumar í varnarmann sem kastar sér fyrir skotið. Enn markalaust í Gelsenkirchen en United gæti hæglega verið búið að gera útum leikinn.

28. Manuel Neuer er enn og aftur vel á verði í marki Schalke og ver vel skalla frá Park Ji-sung.

26. Enn eitt færi United, Javier Hernandez er kominn alla leið inní markteig, hægra megin, en sendir boltann framhjá stönginni fjær.

14. Javier Hernández fær sannkallað dauðafæri fyrir United, aleinn gegn Manfred Neuer sem lokar vel á hann og ver frá Mexíkóanum.

5. Neuer er aftur vel á verði og ver hörkuskot frá Park Ji-sung.

3. Manfred Neuer ver glæsilega frá Wayne Rooney, slær boltann naumlega í horn.

1. Leikurinn er hafinn.

Schalke: Neuer, Uchida, Matip, Metzelder, Sarpei, Farfan, Papadopoulos, Jurado, Baumjohann, Raúl, Edu.
Varamenn: Schober, Escudero, Plestan, Kluge, Charisteas, Karimi, Draxler.

Man Utd: Van der Sar, Fabio Da Silva, Ferdinand, Vidic, Evra, Valencia, Carrick, Giggs, Park, Rooney, Hernandez.
Varamenn: Kuszczak, Anderson, Smalling, Nani, Scholes, Rafael Da Silva, Evans.