Ferguson: Finnum lausn við Messi

Sir Alex Ferguson knattspyrnustjóri Manchester United segir að lið sitt muni finna lausn á því hvernig á að halda aftur að Argentínumanninum Lionel Messi þegar United og Barcelona eigast við í úrslitaleik Meistaradeildarinnar á Wembley á laugardaginn.

Messi fór oft illa með vörn United þegar liðin áttust við í úrslitaleik Meistaradeildarinnar í Róm fyrir tveimur árum þar sem Börsungar höfðu betur, 2:0. Síðan þá hefur Messi stimplað sig inn sem besti knattspyrnumaður heims og sumir vilja meina að betri fótboltamaður hafi ekki komið fram.

,,Við höfum mætt Barcelona í þrígang þar sem Messi hefur verið með. Það er alltaf til lausn til að halda aftur að góðum leikmönnum og vonandi finnum við eina á laugdardaginn. Barcelona hefur fleiri góða leikmenn í sínum röðum og það höfum við líka. Þess vegna er þetta svona heillandi leikur,“ sagði Ferguson við fréttamenn í dag.