Wenger: Vil gæði frekar en magn

Arsene Wenger, knattspyrnustjóri Arsenal, tók því rólega í gær þó þá væri síðasti dagur félagaskipta á þessu ári. Hann keypti engan leikmann á lokasprettinum í ágúst en lauk mánuðinum á því að lána tvo.

Nicklas Bendtner, sem var í láni hjá Sunderland síðasta vetur, fór til Juventus á Ítalíu og Suður-Kóreubúinn Park Chu-young fór til Celta Vigo á Spáni.

Wenger seldi tvo lykilmenn í sumar, Robin van Persie til Manchester United og Alex Song til Barcelona, en keypti þrjá í staðinn. Santi Cazorla frá Málaga, Olivier Giroud frá Montpellier og Lukas Podolski frá Köln.

„Við vorum búnir að kaupa menn, Podolski, Cazorla og Giroud. En fólk vill alltaf að maður kaupi meira. Það eru hinsvegar engin gæði fólgin í því að eyða peningum. Það eru gæði að kaupa leikmenn sem styrkja liðið,“ sagði Wenger í viðtali við Daily Star í dag, þar sem hann var spurður út í leikmannakaup félagsins, eða skort á þeim.

„Við eyðum peningum þegar við finnum réttu leikmennina. Nýir leikmenn þurfa líka sinn tíma. Þegar Thierry Henry kom til okkar byrjaði hann ekki að spila fyrr en í nóvember. Robert Pires fór ekki beint í byrjunarliðið. Það sem skiptir máli er að hafa trú á þeim leikmönnum sem eru til staðar og fá til baka þá sem hafa verið meiddir lengi, eins og Jack Wilshere,“ sagði Wenger.

Arsenal hefur gert 0:0-jafntefli í fyrstu tveimur leikjum sínum í úrvalsdeildinni, gegn Sunderland og Stoke, og sækir Liverpool heim á morgun.

Leikmannaskipti Arsenal í sumar voru þannig:

Komnir:
Santi Cazorla frá Málaga
Olivier Giroud frá Montpellier
Lukas Podolski frá Köln

Farnir:
Benik Afobe til Bolton (lán)
Manuel Almunia til Watford
Nicklas Bendtner til Juventus (lán)
Daniel Boateng til Oxford (lán)
Park Chu-young til Celta Vigo (lán)
Tom Cruise til Torquay
Denilson til Sao Paulo (lán, framlengt)
Gavin Hoyte til Dagenham & Redbridge
Henri Lansbury til Nottingham Forest
Damian Martinez til Oxford (lán)
Ryo Miyaichi til Wigan (lán)
Jeffrey Monakana til Preston
Robin van Persie til Manchester United
Alex Song til Barcelona
Carlos Vela til Real Sociedad

• 1 blogg um fréttina

Bloggað um fréttina

• Haraldur Haraldsson: Wenger: Vil gæði frekar en magn/Við bara treysum honum Karlinum …