Íþróttir | Enski boltinn | mbl | 5.1.2013 | 17:06 | Uppfært 18:19

Gylfi og félagar áfram - öll úrslitin í bikarnum

Gylfi Þór Sigurðsson í leiknum gegn Coventry í dag. AFP

Manchester City, Chelsea og Tottenham áttu ekki í neinum vandræðum með að komast áfram í fjórðu umferð ensku bikarkeppninnar en Southampton og Cardiff eru úr leik.

Englandsmeistarar Manchester City unnu öruggan heimasigur á B-deildarliðinu Watford, 3:0, og það sama gerði Tottenham gegn Coventry þar sem Gylfi Þór Sigurðsson var í byrjunarliðinu og átti þátt í fyrsta marki sinna manna. Hann lék í 79 mínútur.

Chelsea fór í heimsókn til Southampton og lenti undir, 1:0, en lét það ekki á sig fá og vann stórsigur, 5:1. Demba Ba var í fyrsta skipti í byrjunarliði Chelsea og skoraði tvö mörk.

Aston Villa er komið áfram eftir sigur á Ipswich, 2:1, og þá vann Norwich útisigur gegn Peterborough og er komið áfram í fjórðu umferðina.

Sunderland, Wigan, Stoke og Fulham þurfa öll að spila aftur gegn sínum andstæðingum eftir að hafa gert jafntefli í dag.

Sunderland gerði jafntefli við B-deildarliðið Bolton, 2:2, Stoke gerði markalaust jafntefli við Crystal Palace og Fulham og Blackpool gerðu einnig jafntefli, 1:1.

Wigan lenti undir gegn C-deildarliðinu Bournemouth en Jordi Gomez bjargaði úrvalsdeildarliðinu og tryggði því annan leik, 1:1.

Þá skildu úrvalsdeildarliðin QPR og WBA jöfn, 1:1, á Loftus Road þar sem Shane Long kom WBA yfir en Kieron Dyer jafnaði metin á 90. mínútu leiksins.

Óvæntustu úrslitin voru hjá Macclesfield og Cardiff þar sem utandeildarliðið vann topplið B-deildarinnar, 2:1, eftir að hafa lent marki undir. Hvorki Aron Einar Gunnarsson né Heiðar Helguson voru í leikmannahópi Cardiff í dag en um hálfgert B-lið var að ræða hjá félaginu.

Þá tapaði annað Íslendingalið, Úlfarnir, fyrir öðru utandeildarliði, Luton, 1:0, á útivelli. Björn Bergmann Sigurðarson var ekki í leikmannahópi Úlfanna, og heldur ekki Eggert Gunnþór Jónsson.

Kári Árnason fékk tvö gul spjöld með skömmu millibili og þar með rautt í tapleik Rotherham gegn Aldershot en Rotherham er því úr leik í bikarnum.