Íþróttir | Enski boltinn | mbl | 26.3.2016 | 12:13

The Guardian fjallar um Bjarna Fel

Bjarni Felixson. Ómar Óskarsson

Bjarni Felixson er aðalumfjöllunarefni í blaðagrein breska dagblaðsins The Guardian í dag. Þar segir frá þeim áhrifum sem þessi fyrrum leikmaður KR og íþróttafréttamaður þjóðarinnar hefur haft á íslenska knattspyrnu í gegnum tíðina. Þau eru ekki lítil.

Dregin er upp öskubuskuævintýrismynd af íslenska karlalandsliðinu í knattspyrnu og hversu langan veg það hefur gengið frá fyrsta landsleik þess árið 1946 við Dani og síðar meir er liðið tapaði stórt gegn Frökkum og Belgíu í fyrstu forkeppni landsliðsins sem að tók þátt í fyrir heimsmeistaramótið í Sviss árið 1954. Svo ekki sé minnst á 14:2 tapið gegn Dönum árið 1967.

Ávallt er minnst á knattspyrnuhallirnar og góða menntun íslenska knattspyrnuþjálfara en sjaldnar er minnst á Bjarna Fel, segir í greininni sem blaðamaðurinn Scott Murray skrifar.

„Hægt er að rökstyðja það að hann hafi hafi hvað mest áhrif af öllum. […] Hann færði fyrsta flokks fótbolta inn í stofur landsmanna fyrstur allra og hafði þannig áhrif. Þannig menntaði hann framtíðar kynslóðir stuðningsmanna og leikmanna,” segir Murray.

Mynd af Bjarna, til hægri, árið 1976. Ólafur K. Magnússon

„Það var ekki hægt að fylgjast mikið með fréttum. Við gátum hlustað á BBC World Service í útvarpinu. Sunnudagsblöðin komu til Rekjavíkur og voru seld í bókabúðum á þriðjudögum. Þá lásum við um leikina. Það var skrýtinn hópur náunga sem fylgdist með fótbolta í þá daga. Það breyttist allt þegar sjónvarpið kom til sögunnar,” segir Bjarni sjálfur en það var skömmu eftir 1966.

Bjarni sagði einnig í greininni frá skemmtilegri sögu er hann var leikmaður KR og mætti enska stórliðinu Liverpool í Evrópukeppninni. Þá var goðsögnin Bill Shankly við stjórnvölinn.

„Bill Shankly var mjög góður náungi, mjög skemmtilegur. Hann var leikmönnum sínum sem faðir. Hann var mjög ánægður að vera í Reykjavík því í þá daga var ekki löglegt að drekka bjór. Hann gat hleypt liðinu sínu niður í bær og ekki haft áhyggjur af neinu,” segir Bjarni sem sagði einnig að sú staðreynd að KR-liðið hefði ferðast á Anfield með strætó þegar liðið átti að leika gegn Liverpool hafi gert liðið mjög vinsælt þar í borg.

Grein Scott Murray í The Guardian má lesa hér.