Rafael Benitez, knattspyrnustjóri Newcastle United á Englandi, framlengdi í dag samning sinn við félagið til næstu þriggja ára en félagið staðfesti þetta í dag. Newcastle féll úr ensku úrvalsdeildinni á dögunum.
Benitez var látinn taka poka sinn hjá spænska stórliðinu Real Madrid í byrjun árs en tveimur mánuðum síðar tók hann við Newcastle.
Honum tókst ekki að koma í veg fyrir að liðið félli niður í B-deildina en hann hefur þó ákveðið að vera áfram hjá félaginu og koma því aftur upp í deild þeirra bestu.
Hann skrifaði í dag undir nýjan þriggja ára samning við félagið en þetta kom fram á heimasíðu Newcastle í dag.
Benitez hefur áður stýrt liðum á borð við Chelsea, Liverpool, Napoli og Valencia.