Liverpool býðst að kaupa leikmann United

Enska knattspyrnufélaginu Liverpool hefur boðist að kaupa Paul Pogba af erkifjendum sínum í Manchester United.

Það er franski miðillinn Le10Sport sem heldur þessu fram en í fréttinni segir að umboðsmaður Pogba, Mino Raiola sem þykir mikið ólíkindatól, hafi sett sig í samband við forráðamenn Liverpool um möguleg félagsskipti.

Pogba á eitt ár eftir af samningi sínum hjá United og hefur óendanlega mikið verið rætt og ritað um framtíð hans hjá félaginu. The Athletic sagði frá því í gær að Raiola væri byrjaður að semja um kaup og kjör við franska stórliðið PSG en Frakkinn þykir í það minnsta ekki líklegur til að endurnýja samning sinn við Manchester-félagið.

Liverpool missti nýlega Georginio Wijnaldum til PSG og er því á höttunum eftir nýjum miðjumanni en það verður að teljast ansi ólíklegt að Manchester United sé tilbúið að selja eina af stjörnum sínum til Liverpool.

• 1 blogg um fréttina

Bloggað um fréttina

• Jóhann Elíasson: EKKI HEF ÉG TRÚ Á AÐ LIVERPOOL HAFI ÁHUGA Á …