Íþróttir | Enski boltinn | mbl | 30.4.2023 | 17:42 | Uppfært 23:08

Ótrúleg dramatík á Anfield

Mynd 1 af 7 Diogo Jota var ofursvalur og létt sér fátt um finnast þegar hann tryggði Liverpool sigurinn á fjórðu mínútu í viðbótartíma á Anfield í dag. AFP/Paul Ellis

Mynd 2 af 7 Richarlison fagnar jöfnunarmarki sínu ógerlega í dag. Tottenham kom til baka úr stöðunni 3:0 og jafnaði í 3:3 þegar þrjár mínútur voru komnar fram yfir venjulegan leiktíma. AFP/Paul Ellis

Mynd 3 af 7 Son Heung-min fagnar öðru marki Tottenham í seinni hálfleik á Anfield og hvetur menn til dáða. AFP/Paul Ellis

Mynd 4 af 7 Harry Kane fagnar marki sínu í fyrri hálfleik á Anfield í dag. AFP/Paul Ellis

Mynd 5 af 7 Mohamed Salah skorar af vítapunktinum og kemur Liverpool í ansi vænlega stöðu. AFP/Paul Ellis

Mynd 6 af 7 Luis Diaz tvöfaldaði forystu Liverpool strax á fimmtu mínútu leiksins. AFP/Paul Ellis

Mynd 7 af 7 Curtis Jones fagnar fyrsta marki Liverpool á Anfield í dag. Hann kláraði færið sitt vel eftir góða fyrirgjöf Trent Alexander-Arnold. AFP/Paul Ellis

Liverpool vann ótrúlegan heimasigur á Tottenham, 4:3, í ansi athyglisverðum leik í ensku úrvalsdeildinni í dag sem lauk með ótrúlega dramatískum hætti.

Með sigrinum fer liðið tveimur stigum upp fyrir Tottenham og í fimmta sæti deildarinnar, hefur þannig sætaskipti við Lundúnaliðið.

Eitt lið á vellinum

Það var aðeins eitt lið á vellinum fyrstu hálfa klukkustundina eins og gangur leiksins gefur til kynna. Curtis Jones skoraði fyrsta mark Liverpool á þriðju mínútu og Luis Diaz tvöfaldaði forystu liðsins tveimur mínútum síðar. Á 15. mínútu skoraði Mohamed Salah úr vítaspyrnu eftir að Cristian Romero reif Cody Gakpo niður í teignum. Liverpool átti sex marktilraunir en Tottenham enga og Liverpool var með boltann yfir 70% tímans.

Leikar snúast

Þá tók Tottenham skyndilega við sér og Liverpool var í töluverðum vandræðum með gestina það sem eftir lifði fyrri hálfleiks. Van Dijk varði á línu frá Son áður en Harry Kane skoraði fyrir Tottenham á 40. mínútu leiksins. Stuttu síðar varði Alisson frábærlega einn gegn Kulusevski og þá átti Son stangarskot en var reyndar flaggaður rangstæður. Hálfleikstölur 3:1 Liverpool í vil.

Það er óhætt að segja að Tottenham hafi verið sterkara liðið í seinni hálfleik. Tvö stangarskot á sömu mínútunni frá Son Heung-min og Cristian Romero áður en Son minnkaði muninn í 3:2 á 77. mínútu leiksins. Liverpool virtist vera að sigla sigrinum heim en sex mínútum var bætt við venjulegan leiktíma. Það var svo Richarlison sem jafnaði metin í 3:3 þegar þrjár mínútur voru komnar fram yfir.

Ofursvalur Jota

Aðeins mínútu síðar hrökk boltinn inn fyrir vörnina til varamannsins Diogo Jota sem þakkaði ofursvalur pent fyrir sig og tryggði Liverpool sigurinn í ótrúlegum fótboltaleik.

Tottenham kastaði leiknum frá sér á fyrstu fimmtán mínútunum en gerði vel að koma til baka. Ótrúlega svekkjandi fyrir Lundúnaliðið að fá ekkert út úr leiknum. Liverpool er á góðu skriði þessa dagana en varnarleikur liðsins er þó enn brokkgengur.