Heimsmeistarinn Fernando Alonso hjá McLaren reyndist hraðskreiðastur á fyrri æfingu dagsins í Melbourne og þeirri fyrstu á keppnistíðinni. Brautirnar vor blautar lengst af vegna rigningar í nótt og ekki skipt yfir á þurrdekk fyrr en á síðustu mínútunum.

Alonso byrjaði titilvörnina af krafti og var 1,5 sekúndum fljótari með hringinn en næsti maður, Felipe Massa. Munurinn gefur þó ekki rétta mynd af stöðunni því flestir hröðustu tímarnir náðust í miklum hamagangi síðustu mínútur æfingarinnar en það var fyrst þá sem ökuþórarnir gátu ekið á þurrdekkjum.

Sebastian Vettel á BMW setti þriðja besta tímann en hann var fyrsti ökuþórinn út í brautina. Nýliðinn Lewis Hamilton hjá McLaren stóð sig vel og setti þanan fjórða besta, var rétt á undan landa sínum Jenson Button á Honda og varaþór Williams, Kazuki Nakajima.

Þrátt fyrir nýja æfingafyrirkomulagið á föstudögum, sem talið er til þess fallið að tryggja talsverðan akstur í brautinni, héldu nær allir ökuþórarnir sig inni í bílskúr fyrstu hálfu klukkustundina vegna bleytu.

Alonso lagði af stað þegar klukkustund af 90 mínútum lifði eftir en Ferraribílarnir birtust ekki fyrr en eftir klukkustund, þ.e. óku aðeins á síðustu 30 mínútunum. Kimi Räikkönen setti strax besta tímann og Massa þann næstbesta rétt á eftir.

Nick Heidfeld á BMW ók þá nokkra hraða hringi og sat á toppi tímalistans þegar rúmar 20 mínútur voru eftir. Brautin var þá tekin að þorna og setti hann næstum tveimur sekúndum betri tíma en Räikkönen. Fyrstur á þurrdekk var Mark Webber á Red Bull er sjö mínútur voru eftir. Setti hann strax fimm sekúndum betri tíma en Heidfeld en flaug síðan út úr brautinni á næsta hring.

Í hamaganginum sem á eftir fylgdi skiptust Button, Vettel og Massa á bestu tímum en er 40 sekúndur voru eftir lét Alonso vita af sér á ný og enginn bætti tíma hans. Massa gerði tilraun til þess en brautin var ekki greið vegna fjölda bíla í henni. Taldi hann Vitantonio Liuzzi á Toro Rosso hafa truflað sig og steytti í hann hnefa er hann komst fram úr.

Räikkönen náði heldur ekki hreinum hring á þurrdekkjum og endaði í aðeins 19. sæti. Hann hlaut síðan 200 evru sekt fyrir að aka 11,7 km/klst hraðar í bílskúrareininni en leyfilegt var.

Niðurstaða æfingarinnar varð sem hér segir:

Röð	Ökuþór	Bíll	Tími	Munur	Hri.
1.	Alonso	McLaren	1:29.214		23
2.	Massa	Ferrari	1:30.707	+1.493	7
3.	Vettel	BMW	1:30.857	+1.643	22
4.	Hamilton	McLaren	1:30.878	+1.664	14
5.	Button	Honda	1:31.162	+1.948	15
6.	Nakajima	Williams	1:31.401	+2.187	21
7.	Coulthard	Red Bull	1:31.528	+2.314	9
8.	Kovalainen	Renault	1:31.571	+2.357	20
9.	Webber	Red Bull	1:31.661	+2.447	16
10.	Barrichello	Honda	1:31.737	+2.523	12
11.	Sato	Super Aguri	1:31.782	+2.568	7
12.	Fisichella	Renault	1:32.011	+2.797	14
13.	Wurz	Williams	1:32.194	+2.980	18
14.	Sutil	Spyker	1:34.043	+4.829	26
15.	Liuzzi	Toro Rosso	1:34.627	+5.413	8
16.	Albers	Spyker	1:35.055	+5.841	10
17.	Heidfeld	BMW	1:37.249	+8.035	12
18.	Davidson	Super Aguri	1:39.221	+10.007	6
19.	Räikkönen	Ferrari	1:39.242	+10.028	7
20.	R.Schumacher	Toyota	1:39.550	+10.336	9
21.	Speed	Toro Rosso	1:41.763	+12.549	9
22.	Trulli	Toyota	1:44.130	+14.916	11