Íþróttir | Formúla 1 | mbl | 14.5.2007 | 17:42

Vængur McLaren löglegur

Nýi framvængur McLarenliðsins. „Brúin“ enda á milli ofan trjónunnar er nýjung. ap

Nýi róttæki framvængur McLarenliðsins, brúarvængurinn svonefndi, er löglegur, að sögn Alþjóða akstursíþróttasambandsins (FIA). Nokkrir keppinautar McLaren létu í ljós áhyggjur við FIA að vængurinn svignaði á miklum hraða og væri þannig ólöglegur.

Tæknideild FIA tók vænginn til athugunar og ítarlegrar prófunar í Barcelona en keppinautum McLaren þótti sýnt að myndir úr bílum Fernando Alonso og Lewis Hamilton sýndu fram á að vængurinn sveigðist niður á miklum hraða á beinum brautarköflum.

Niðurstaða tæknideildar FIA var að ekkert væri athugavert við McLarenvænginn. Talsmaður FIA staðfesti það í dag og sagði engra frekari aðgerða þörf.

Framkvæmdastjóri McLaren, Martin Whitmarsh, segir við vefsetrið autosport.com að aldrei hafi leikið nokkur vafi á því innan liðsins að vængurinn stangaðist á við lög. Hann sagði og að myndir úr bílum Alonso og Hamilton sýndu fram á, ef eitthvað væri, að vængurinn væri mjög stöðugur og gæfi í raun ekkert eftir.