Lewis Hamilton hjá McLaren hefur ólíkt mörgum keppinauta sinna aldrei ekið í Montreal fyrr en um þessa helgi. Það lét hann ekki þvælast fyrir sér í dag, á lokaæfingunni fyrir tímatökurnar, heldur ók af krafti og setti besta brautartímann.

Vegna slæmra brautarskilyrða og truflana vegna óhappa spöruðu ökumennirnir bíla sína á æfingunni. Kimi Räikkönen á Ferrari ók næsthraðast og heimsmeistarinn Fernando Alonso, liðsfélagi Hamilton, setti þriðja besta tímann.

Talsvert sementsryk var á brautunum eftir hreinsunarstörf í framhaldi af keppni í formúlu Ford. Og rétt áður en æfingin virtist ætla að hefjast fyrir alvöru sprakk mótor í Renaultbíl Heikki Kovalainen er hann var að nálgast lokabeygjuna.

Hvellurinn var það mikill að mikil olía bunaði úr bílnum niður á brautina. Tók tíma að hreinsa hana upp svo hægt væri að hefja leik aftur.

Kovalainen hefur ekki átt góða helgi því hann gat lítið æft í gær vegna áreksturs og vegna vélarbilunarinnar blasir við honum 10 sæta afturfærsla á rásmarki eftir tímatökur.

Takuma Sato á Super Aguri var meðal fremstu manna og Rubens Barrichello gaf til kynna með árangri sínum, að Hondan fari batnandi. Seinni Super Aguri bíllinn varð í tíunda sæti og spurning hvort hin hraða braut í Montreal henti þessum bíl betur en öðrum.

Nick Heidfeld lauk æfingunni með reykjarbólstra aftur úr BMW-inum.

Niðurstaða æfingarinnar varð annars sem hér segir:

Röð	Ökuþór	Bíll	Tími	Bil	Hri.
1.	Hamilton	McLaren	1:16.071		12
2.	Räikkönen	Ferrari	1:16.459	+0.388	14
3.	Alonso	McLaren	1:16.465	+0.394	9
4.	Massa	Ferrari	1:16.666	+0.595	13
5.	Sato	Super Aguri	1:16.864	+0.793	12
6.	Rosberg	Williams	1:16.975	+0.904	14
7.	Webber	Red Bull	1:17.071	+1.000	11
8.	Barrichello	Honda	1:17.329	+1.258	16
9.	Coulthard	Red Bull	1:17.391	+1.320	11
10.	Davidson	Super Aguri	1:17.391	+1.320	15
11.	Fisichella	Renault	1:17.454	+1.383	12
12.	Button	Honda	1:17.468	+1.397	15
13.	Kubica	BMW	1:17.601	+1.530	12
14.	Trulli	Toyota	1:17.624	+1.553	17
15.	Speed	Toro Rosso	1:17.742	+1.671	12
16.	R.Schumacher	Toyota	1:17.748	+1.677	13
17.	Liuzzi	Toro Rosso	1:17.799	+1.728	14
18.	Sutil	Spyker	1:18.270	+2.199	13
19.	Heidfeld	BMW	1:18.428	+2.357	5
20.	Wurz	Williams	1:18.489	+2.418	11
21.	Kovalainen	Renault	1:18.758	+2.687	10
22.	Albers	Spyker	1:18.933	+2.862	13