Fernando Alonso á McLaren var í þessu að vinna ráspól ungverska kappakstursins í Búdapest. Skaust hann á síðustu sekúndu fram fyrir félaga sinn Lewis Hamilton sem gat ekki klárað lokatilraun sína vegna tímaskorts. Þriðji varð Nick Heidfeld á BMW.

Hamilton virtist hraðskreiðari en Alonso en tafðist fyrir aftan hann fyrir síðustu dekkjaskipti og komst því ekki í tæka tíð yfir marklínuna á úthring til að hefja lokatilraun sína að ráspól.

Af einhverri ástæðu tóku tvenn síðustu dekkjaskipti Alonso mun meiri tíma en venjulegt er, m.a. flæktist dekkjahitari í fjöðrunarbúnaði í fyrra tilvikinu. Og í seinna skiptið liðu nokkrar sekúndur frá því Alonso var gefið merki um að aka af stað þar til hann kom sér af þjónustusvæðinu.

Þrátt fyrir að silfurörvarnar næðu tveimur efstu sætum var liðsstjórinn Ron Dennis ekki sáttur við það sem átti sér stað á bílskúrareininni og fleygði frá sér heyrnartólum er hann strunsaði af stjórnborðinu í lok tímatökunnar.

Eftir er að koma í ljós hvort um vísvitandi bragð var að ræða af hálfu Alonso til að koma í veg fyrir að Hamilton ætti svar við lokatilraun hans sjálfs.

Ferrari gleymdi að tanka bíl Massa

Nick Heidfeld á BMW kom á óvart með því að vinna þriðja sætið af Kimi Räikkönen á Ferrari. Liðsfélagi Räikkönen, Felipe Massa, átti erfitt uppdráttar og komst ekki í lokalotuna fyrir taktísk mistök Ferrariliðsins, hafnaði í 14. sæti.

Var Massa á leið í tímatilraun í annarri lotu er hann var látinn vita af því að ónóg bensín væri í bílnum. Stöðvaði hann því fák sinn í bílskúrareininni og var ýtt til baka á þjónustusvæðið í skyndi.

Nico Rosberg á Williams náði góðum árangri, varð fimmti og þar á eftir urðu Ralf Schumacher á Toyotu og Robert Kubica á BMW.

David Coulthard á Red Bull var lengi vel í 10. sæti og lokalotan blasti við honum, allt þar til Kubica laumaðist fram úr í lokahring sínum en við því átti Coulthard ekki svar.

Hondurnar skorti hraða til þess að komast áfram úr fyrstu lotu. Einn bíll frá Super Aguri og annar frá Toro Rosso komust hins vegar áfram og urðu Anthony Davidson og Vitantonio Liuzzi í 15. og 16. sæti.

Niðurstaða tímatökunnar varð annars sem hér segir:

Tímatakan í Búdapest			Lota 1			Lota 2			Lota 3
Röð	Ökuþór	Bíll	Röð	Tími	Hri.	Röð	Tími	Hri.	Röð	Tími	Hri.
1.	Alonso	McLaren	5.	1:20.425	3	2.	1:19.661	3	1.	1:19.674	11
2.	Hamilton	McLaren	1.	1:19.570	3	1.	1:19.301	3	2.	1:19.781	11
3.	Heidfeld	BMW	10.	1:20.751	5	6.	1:20.322	6	3.	1:20.259	11
4.	Räikkönen	Ferrari	6.	1:20.435	4	4.	1:20.107	3	4.	1:20.410	12
5.	Rosberg	Williams	9.	1:20.547	6	5.	1:20.188	5	5.	1:20.632	11
6.	R.Schumacher	Toyota	7.	1:20.449	7	8.	1:20.455	6	6.	1:20.714	11
7.	Kubica	BMW	3.	1:20.366	6	10.	1:20.703	6	7.	1:20.876	11
8.	Fisichella	Renault	15.	1:21.645	7	9.	1:20.590	6	8.	1:21.079	12
9.	Trulli	Toyota	8.	1:20.481	6	3.	1:19.951	3	9.	1:21.206	11
10.	Webber	Red Bull	11.	1:20.794	6	7.	1:20.439	5	10.	1:21.256	11
11.	Coulthard	Red Bull	14.	1:21.291	6	11.	1:20.718	6
12.	Kovalainen	Renault	2.	1:20.285	6	12.	1:20.779	6
13.	Wurz	Williams	13.	1:21.243	9	13.	1:20.865	9
14.	Massa	Ferrari	4.	1:20.408	3	14.	1:21.021	6
15.	Davidson	Super Aguri	12.	1:21.018	6	15.	1:21.127	6
16.	Liuzzi	Toro Rosso	16.	1:21.730	9	16.	1:21.993	7
17.	Button	Honda	17.	1:21.737	6
18.	Barrichello	Honda	18.	1:21.877	6
19.	Sato	Super Aguri	19.	1:22.143	6
20.	Vettel	Toro Rosso	20.	1:22.177	7
21.	Sutil	Spyker	21.	1:22.737	9
22.	Yamamoto	Spyker	22.	1:23.774	7