Mark Webber lauk æfingalotu vikunnar í Barcelona í dag með því að setja hraðasta hring dagsins. Virðist Red Bull bíllinn mun sprækari í dag en undanfarna daga.

Reyndar hafa bílar Red Bull ekki virkað sérlega sprækir undanfarnar tvær vikur, fyrr en í dag. Bíllinn er búinn mjög óvenjulegum kambi á vélarhúsinu og virðist það skila árangri.

Besti hringur Webber var fjórum hundruðustu úr sekúndu betri en tími næsta manns, Heikki Kovalainen hjá McLaren. Þriðja besta tímann setti hinn McLarenþórinn, Lewis Hamilton.

Robert Kubica undirstrikaði að BMW hefur komist fyrir vanda í jafnvægi bílsins. Var hann aðeins nokkrum hundruðustu úr sekúndu lengur með hringinn en McLarenþórarnir.

Skyldi það vera til marks um svipaða stöðu bíla, að innan við sekúndu munaði á tíma Webber og tíunda manns, Sebastian Vettel á Toro Rosso, en hann ók hraðast í gær.

Í þessum hópi voru þó ekki nýju bílar Hondaliðsins sem átt hefur slaka daga í Barcelona. Rubens Barrichello og Jenson Button voru í 11. og 13. sæti tímalistans í lok dagsins.

Williamsliðið ók ekki í dag, ákvað að hætta við það þar sem liðið glímir við galla í framvæng sem hrjáði ökuþórana í gær og fyrradag. Liðið vill fá þennan ágalla alveg út úr heiminum áður en að næstu prófanalotu kemur.

Niðurstaða æfingarinnar varð annars sem hér segir:

Röð	Ökuþór	Bíll	Tími	Hri.
1.	Webber	Red Bull	1:22.385	65
2.	Kovalainen	McLaren	1:22.422	67
3.	Hamilton	McLaren	1:22.459	92
4.	Kubica	BMW	1:22.492	83
5.	Alonso	Renault	1:22.509	63
6.	Heidfeld	BMW	1:22.874	79
7.	Bourdais	Toro Rosso	1:22.887	80
8.	Coulthard	Red Bull	1:23.889	81
9.	Piquet	Renault	1:23.039	64
10.	Vettel	Toro Rosso	1:23.232	74
11.	Barrichello	Honda	1:23.795	84
12.	Sutil	Force India	1:23.800	86
13.	Button	Honda	1:23.808	85