Jarno Trulli lauk síðasta bílprófanadegi vetrarins með því að setja besta brautartímann í Barcelona. Virðist Toyotan hafa tekið miklum framförum við reynsluakstur í vetur en næst á dagskrá liða er fyrsti kappakstur ársins, í Melbourne eftir röskan hálfan mánuð.

Trulli var tæplega hálfri sekúndu fljótari með hringinn en næsti maður, David Coulthard hjá Red Bull. Hermt er að báðir hafi náð tímum sínum er þeir líktu eftir tímatökum og því með lítið bensín á bílunum.

„Jákvæður dagur, það má enn bæta bílinn en þetta sýnir að liðið hefur gert góða hluti í vetur. Auðvitað komust við ekki að því hver raunveruleg staða er fyrr en í Melbourne. Ég er bjartsýnn á vertíðina og útlitið er mun betra hjá okkur nú en í fyrra.

Nico Rosberg undirstrikaði styrkleika Williamsliðsins með þriðja besta tímanum og næstir honum urðu Heikki Kovalainen hjá McLaren og Mark Webber á Red Bull.

Nelson Piquet ók ögn hraðar en liðsfélagi hans hjá Renault, Fernando Alonso. Kimi Räikkönen á Ferrari setti níunda besta tíma dagsins og Lewis Hamilton hjá McLaren þann tíunda besta, en hann ók hraðast í gær og fyrradag.

Giancarlo Fisichella hélt uppi öflugri frammistöðu hins nýja bíls Force India með 12. besta tímanum. Var hann næstur á undan Felipe Massa sem sinnti mótorprófunum í dag.

Hondaþórarnir Jenson Button og Alex Wurz settu lökustu tíma dagsins. Honda verður við einkaprófanir í Jerez á Spáni í næstu viku og prófar þar nýjar straumfræðilegar úrlausnir í yfirbyggingu bílsins.

Niðurstaða akstursins í dag varð annars sem hér segir:

Röð	Ökuþór	Bíll	Tími	Hri.
1.	Trulli	Toyota	1:20.801	83
2.	Coulthard	Red Bull	1:21.258	76
3.	Rosberg	Williams	1:21.293	77
4.	Kovalainen	McLaren	1:21.309	87
5.	Webber	Red Bull	1:21.368	91
6.	Piquet	Renault	1:21.443	114
7.	Alonso	Renault	1:21.454	128
8.	Nakajima	Williams	1:21.796	124
9.	Räikkönen	Ferrari	1:21.933	80
10.	Hamilton	McLaren	1:22.011	88
11.	Glock	Toyota	1:22.155	49
12.	Fisichella	Force India	1:22.233	90
13.	Massa	Ferrari	1:22.286	49
14.	Kubica	BMW	1:22.299	93
15.	Bourdais	Toro Rosso	1:22.465	79
16.	Sutil	Force India	1:22.521	97
17.	Heidfeld	BMW	1:22.624	61
18.	Wurz	Honda	1:24.154	82
19.	Button	Honda	1:24.275	73