Nick Heidfeld á BMW setti besta brautartímann á lokaæfingunni fyrir tímatökurnar sem fram fara í Barcelona síðar í dag. David Coulthard á Red Bull ók næsthraðast og þriðja besta tímann setti heimamaðurinn Fernando Alonso á Renault.

Heidfeld var í 19. sæti á lista yfir hröðustu hringi er hann skipti yfir á mýkri dekkinn fyrir lokahring sinn. Munaði um minna því hann skaust við það nánast af botni listans í efsta sæti.

Ökumenn Ferrari og McLaren virtust halda uppteknum hætti að aka með talsvert bensín á æfingunni. Felipe Massa og Kimi Räikkönen settu aðeins níunda og þrettánda besta tíma á Ferrarifákunum. McLarenfélagarnir Lewis Hamilton og Heikki Kovalainen urðu í 11. og 15. sæti.

Listinn yfir hröðustu hringi breyttist hratt fyrsta hálftímann en þá munaði aðeins sekúndu á besta tíma og þeim sextánda. Heimamönnum til ánægju kvað talsvert að Alonso og var hann um tíma hraðskreiðastur.

Undir lokin hafði hann sigið niður í sjöunda sæti en á lokahringnum skaust hann aftur upp og átti um síðiri þriðja besta tímann, aðeins þremur tíundu úr sekúndu á eftir Heidfeld.

Sebastien Bourdais á Toro Rosso varð óvænt sjötti en á eftir honum komu Nelson Piquet á Renault og Jenson Button á Hondu.

Mark Webber á Red Bull tókst ekki að setja tíma, bilun í bensíndælu batt endi á akstur hans áður en hann gat ekið tímahring.

Niðurstaða æfingarinnar varð sem hér segir:

Röð	Ökuþór	Bíll	Tími	Bil	Hri.
1.	Heidfeld	BMW	1:21.269		19
2.	Coulthard	Red Bull	1:21.465	+0.196	16
3.	Alonso	Renault	1:21.599	+0.330	16
4.	Kubica	BMW	1:21.717	+0.448	23
5.	Trulli	Toyota	1:21.771	+0.502	21
6.	Bourdais	Toro Rosso	1:21.942	+0.673	19
7.	Piquet	Renault	1:21.992	+0.723	18
8.	Button	Honda	1:22.060	+0.791	17
9.	Massa	Ferrari	1:22.075	+0.806	16
10.	Glock	Toyota	1:22.081	+0.812	23
11.	Hamilton	McLaren	1:22.094	+0.825	15
12.	Rosberg	Williams	1:22.174	+0.905	19
13.	Räikkönen	Ferrari	1:22.176	+0.907	18
14.	Nakajima	Williams	1:22.189	+0.920	16
15.	Kovalainen	McLaren	1:22.220	+0.951	16
16.	Vettel	Toro Rosso	1:22.292	+1.023	20
17.	Barrichello	Honda	1:22.350	+1.081	17
18.	Fisichella	Force India	1:22.466	+1.197	22
19.	Sutil	Force India	1:22.689	+1.420	21
20.	Sato	Super Aguri	1:23.726	+2.457	16
21.	Davidson	Super Aguri	1:23.921	+2.652	15
22.	Webber	Red Bull			2