Heikki Kovalainen hjá McLaren segist ekki muna neitt af því er bíll hans flaug út úr brautinni í kappakstrinum í Barcelona á 240 km/klst hraða og grófst í öryggisvegg. Gagnrýnt er hversu stutt er í vegginn frá brautinni í viðkomandi beygju.

Kovalainen er laus af sjúkrahúsi í Barcelona en mun dveljast í borginni í nokkra daga áður en hann snýr heim og tekur til við léttar æfingar í framhaldi af slysinu.

Hann segir einu eftirköstin af skellinum harða á öryggisveggnum vera höfuðverk og hálsríg. Hlaut hann smávægilegan heilahristing við höggið auk þess sem hann missti meðvitund í nokkurn tíma.

„Að þessu frátöldu hef ég það fínt og andinn er góður. Nú einbeiti ég mér að því að fá mig fullsterkan sem fyrst svo ég komist í gegnum læknisskoðun Alþjóða akstursíþróttasambandsins (FIA) sem er forsenda þess að ég fái að keppa í Tyrklandi,“ sagði Kovalainen.

Mark Webber hjá Red Bull, sem er í fyrirsvari fyrir ökuþórum formúlunnar, segir tíma til kominn að endurskoða afrennslissvæðið við beygjuna sem Kovalainen flaug út úr, svonefnda Campsa-beygju sem ekin er á miklum hraða.

„Öryggissvæðið er alltof naumt og það verður að skoða,“ segir Webber í dálki sínum fyrir breska útvarpið, BBC. „Þetta er sennilega versti staðurinn í allri brautinni til að verða fyrir slysi,“ skrifar hann.

Tengdar fréttir

Formúla-1/McLaren

Ricciardo til McLaren

• Sainz í stað Vettels
• Honda hindrar Alonso
• Grunnvandi McLaren úr sögunni
• Häkkinen snýr aftur

» Fleiri tengdar fréttir

• 1 blogg um fréttina

Bloggað um fréttina

• Helga Linnet: man ekkert!