Lewis Hamilton vann keppnina um ráspól ungverska kappakstursins rétt í þessu og liðsfélagi hans Heikki Kovalainen varð annar. Hefja þeir því keppni af fremstu ráslínu á morgun. Þriðji varð Felipe Massa á Ferrari en félagi hans og heimsmeistari, Kimi Räikkönen, varð aðeins sjötti.

Ráspóllinn er sá tíundi sem Hamilton vinnur á ferlinum og með honum er hann í kjöraðstöðu til að aka til sigurs þriðja kappaksturinn í röð. Þá tvo síðustu vann hann af miklu öryggi og með yfirburðum.

Kovalainen gekk illa í fyrri tímatilrauninni í lokalotunni og setti þá aðeins níunda besta tíma. En bætti um betur svo um munaði í seinni atlögunni að tíma.

Massa bjargaði heiðri Ferrari en Räikkönen minnti lítt á heimsmeistara í dag fremur en í undanförnum mótum.

Robert Kubica hjá BMW bætti sig og bætti eftir því sem á tímatökurnar leið og hafnaði á endanum í fjórða sæti. Allt annar gangur var á liðsfélaga hans Nick Heidfeld sem féll úr leik í fyrstu lotu og varð 16.

Maður tímatökunnar er tvímælalaust Timo Glock hjá Toyota. Var efstur eftir fyrri umferð lokalotunnar en hafnaði endanlega í fimmta sæti og hefur aldrei náð svo langt á ferlinum í tímatökum. Glock varð fjórum sætum framar liðsfélaga sínum Jarno Trulli.

Allt stefnir í harða keppni um fjórða sæti í stigakeppni bílsmiða þar sem Red Bull, Toyota og Renault bítast. Fernando Alonso og Nelson Piquet hjá franska liðinu urðu í sjöunda og tíunda sæti en milli þeirra eru Mark Webber á Red Bull og Trulli.

Williamsliðið átti erfiðan dag en Nico Rosberg gat ekki klárað aðra lotu vegna vökvakerfisbilunar.

Niðurstaða tímatökunnar varð annars sem hér segir:

Röð	Ökuþór	Bíll	Lota 1	Lota 2	Lota 3	Hri.
1.	Hamilton	McLaren	1:19.376	1:19.473	1:20.899	12
2.	Kovalainen	McLaren	1:19.945	1:19.480	1:21.140	16
3.	Massa	Ferrari	1:19.578	1:19.068	1:21.191	16
4.	Kubica	BMW	1:20.053	1:19.776	1:21.281	19
5.	Glock	Toyota	1:19.980	1:19.246	1:21.326	24
6.	Räikkönen	Ferrari	1:20.006	1:19.546	1:21.516	19
7.	Alonso	Renault	1:20.229	1:19.816	1:21.698	15
8.	Webber	Red Bull	1:20.073	1:20.046	1:21.732	18
9.	Trulli	Toyota	1:19.942	1:19.486	1:21.767	20
10.	Piquet	Renault	1:20.583	1:20.131	1:22.371	19
11.	Vettel	Toro Rosso	1:20.157	1:20.144		17
12.	Button	Honda	1:20.888	1:20.332		15
13.	Coulthard	Red Bull	1:20.505	1:20.502		16
14.	Bourdais	Toro Rosso	1:20.640	1:20.963		16
15.	Rosberg	Williams	1:20.748			10
16.	Heidfeld	BMW	1:21.045			7
17.	Nakajima	Williams	1:21.085			9
18.	Barrichello	Honda	1:21.332			8
19.	Fisichella	Force India	1:21.670			9
20.	Sutil	Force India	1:22.113			10